Таяуда мектебімізде тілдер айлығының аясында «Тіл тағдыры – Ел тағдыры» деген тақырыпта мерекелік кеш өтті. Салтанатты шараға филология ғылымдарының кандидаты, С.Сейфуллин атындағы мұражайдың аға ғылыми қызметкері Құрманғалиев Ілияс Рысбекұлы қатысты. Кешті мектеп директоры Шәріпхан Қажытайұлы ашып берді. «Серпер» домбырашылар ансамблі күмбірлете күй шертіп, «Тұмар» би тобы мың бұрала қазақ биін биледі. Жас ақындар тіл туралы жүрек жарды туындыларын оқып, күміс көмей әншілер көрермендерді тамсанта ән шырқады. «Сахна өнері» үйірмесінің оқушылары әзірлеген «Тіл - тарих» қойылымы көпшіліктің көңілінен шықты. Еуразия Ұлттық Университетінен келген айтыскер ақын Қайрат Нұрқанаттың арнауы оқушылардың ыстық ықыласына ие болды. Білім беру ісінің құрметті қызметкері Тілеубек Ысқақұлы оқушыларға «тіл мәртебесін көтеру сендердің қолдарыңда» деп сенім білдірді.
